admin

Administrator

الناس اللي ما تعرفش ايه هو البيتكوين.. البوست ده ممكن يفيدك

البيتكوين عبارة عن عملة الكترونية تم اختراعها في حدود سنة 2009 على يد شخص مجهول الهوية مسمي نفسه "ساتوشي ناكاموتو"

وكان سعرها في البداية حوالي 0.03$ للبيتكوين الواحد، دلوقتي وصل سعرها 19300$

والتغير ده بالنسبة للناس اللي بتتعامل في البورصة او بتهتم بيها يعتبر حد الجنون.. بمعنى ان لو حد كان مشتري ب 1$ بيتكوين "حوالي 33.33" وركنهم على جمب يقدر النهاردة يبيعهم ب 643,269$ يعني حوالي 11 مليون جنية مصري


والارتفاع المبالغ فيه ده نتيجة شدة الإقبال عليه من الجماهير في جميع أنحاء العالم وده لأسباب مهمة جداً..

منها إن العملة دي غير مركزية.. بمعنى إنها مش خاضعة لرقابة وتحكم المؤسسات النقدية العالمية ومالهاش بنك مركزي بيطبعها.

العملة دي يمكن تعدينها عن طريق استخدام أجهزة كمبيوتر بإمكانيات عالية وتوصيلها بسيرفرات معينة بحيث إنها تعالج عمليات حسابية ولوغاريتمات معقدة ويكون الناتج هو البيتكوين.

تداول العملة دي بين الأفراد مش محتاج وسيط يعني لو ليك قريب في أمريكا عاوز تبعتله 0.05 بيتكوين مثلاً علشان يفك زنقته
هايوصلوله 0.05 يعني مفيش عمولات ولاضرايب وبيوصلوا في نفس اللحظة.

مؤخراً شركات عالمية زي مايكروسوفت وأمازون أعلنوا إنهم بيقبلوا الدفع مقابل المشتريات عن طريق عملة البيتكوين.

الأهم من ده كله إن التكنولوجيا اللي ورا العملة دي واللي أسمها "بلوك شاين" او سلسلة الكتل، تعتبر طفرة في عالم البرمجيات وعدد كبير من الخبراء في مجال البرمجيات المالية fintech بيتوقعوا إن البلوك شاين هو مستقبل التعاملات النقدية وإن العملات الإلكترونية هي المستقبل والبديل للنظام النقدي بصورته الحالية.

ده غير ان تكنولوجيا البلوك شاين بتقدر تسجل كل المعاملات اللي تمت عن طريقها بشكل متسلسل، يعني تقدر تعرف مصدر الفلوس اللي معاك من ساعة ما تم تعدينها لحد اما وصلت لأيدك.

وده من تطبيقاته مثلاً إنك لو حابب تشتري هدوم مثلاً وعاوز تعرف مستوردة ولا محلية ممكن تكشف عن فاتورة الشراء بتاعة البياع علشان تعرف مصدر السلعة دي بالتحديد.. يعني محدش هايقدر يغشك بعد كدة.

ومن حوالي شهر اعلنت حكومة الإمارات انها بصدد تطبيق نظام البلوك شاين في المعاملات الحكومية بحلول عام 2020

خطورة العملة دي بقى في عدة نقاط منها:

- إن مالهاش سعر محدد "بيتغير قيمتها بجنون"
- ما تقدرش تستخدمها غير بشكل إلكتروني فقط "ما تعرفش تمسكها بايدك"
- ممكن لو موبايلك اتفيرس تلاقي هاكر سرق كل فلوسك


وبالتالي فمستقبلها غامض حتى الآن ومحدش يعرف الجنون السعري ده مجرد فقاعة مسيرها تفرقع وتنهار في يوم من الأيام، ولا فعلاً هتكون نظام جديد وبديل للنقود الورقية.

تعديل: نصيحة محدش يجرب من غير استشارة فقيه، نظراً لوجود شبهة شرعية ومخاطر عالية.

#بيتكوين
#بلوك_شاين
 

المواضيع المشابهة

أعلى